Të tallurit me fenë e Allahut xh.sh

Të tallurit me diçka prej fesë së Muhamedit s.a.v.s është kufër (mosbesim), si për shembull të tallurit me mjekër, shpërblimin në xhennet apo me ndonjë ndëshkim në xhehennem, etj. Allahu xh.sh ka thënë:

"E nëse i pyet ti ata (përse tallen), do të thonë: "Ne vetëm jemi mahnitur e dëfruar. Thuaj: A me All-llahun, librin dhe të dërguarin e Tij talleni? Mos kërkoni fare ndjesë, ju pasi që (shpallët se) besuat, keni mohuar (keni bërë kufër)."
[Et-Teube, 65-66]

Allahu xh.sh iu është kërcënuar atyre që tallen me fenë e Allahut xh.sh me një ndëshkim të dhimbshëm ku thotë:
"Edhe kur të mësojnë diçka prej ajeteve Tona, ai i merr ato për tallje. Për të tillët pason një dënim shtypës."
[El-Xhathije, 9]

Dhe dihet se, Allahu xh.sh me këtë lloj dënimi nuk i dënon besimtarët. Pra ata që tallen me fenë e Allahut janë pabesimtarë.

Ibn Hazmi ka thënë:
"Argumentet nga Kur'ani dhe Sunneti tregojnë se, çdo person i cili tallet me Allahun xh.sh, apo me ndonjë melaqe prej melaqeve, apo me ndonjë pejgamber prej pejgamberëve (alejhimus-selam), ose tallet me ndonjë ajet prej ajeteve të Kur'anit, apo me ndonjë obligim prej obligimeve të fesë (si p.sh, me namaz, haxhxh etj) është qafir (pabesimtar)."
[Shih: El-Fasl, 3/299]

"E kur të shohin ty, nuk të çmojnë ndryshe, por vetëm në tallje e thonë: "A ky është ai që All-llahu e dërgoi pejgamber? Sikur ne të mos ishim të qëndrueshëm ndaj tyre, ai gati na pat zmbrapsur prej zotave tanë!” E më vonë, kur ta shohin qartazi dënimin, do ta kuptojnë se kush ishte më larg nga e vërteta."
[El-Furkan, 41-42]

Të tallurit me fenë e Allahut xh.sh është prej cilësive të munafikëve (hipokritëve), Allahu xh.sh thotë:
"Mëkatarët ishin ata të cilët i përqeshnin ata që besuan. Dhe kur kalonin (besimtarët) pranë tyre (idhujtarëve), ata ia bënin me sy njëri-tjetrit. E kur ktheheshin te familjet e veta, ktheheshin të kënaqur. Dhe kur i shihnin ata (besimtarët), thoshnin:S’ka dyshim se këta (besimtarët) janë të humbur!Po Ne, nuk i caktuam ata (idhujtarët) si roje të atyre (besimtarëve)."
[El-Mutaffifin, 29-33]

Ai i cili tallet me diç prej fesë së Allahut xh.sh apo me diçka çka i ka zbritur Pejgamberit s.a.v.s është pabesimtar, edhe nëse pretendon se nuk ka pasur për qëllim që të dal prej fesë, edhe nëse është prej atyre që e fal namazin dhe agjëron ramazanin.

Ai person i cili tallet me fenë e Allahut xh.sh ka dal prej fesë islame dhe nuk është musliman, sepse Allahu xh.sh në ajetet e lartpërmendura, i quajti pabesimtarë ata të cilët talleshin me besimtarët.

Allahu xh.sh gjithashtu e ka ndaluar që të rrihet aty ku tallen me fenë e Allahut xh.sh. Allahu xh.sh thotë:
"Juve u është shpallur në librin (Kur’anin) që, kur të dëgjoni se po mohohet Kur’ani i All-llahut dhe po bëhet tallje me të, mos rrini me ata derisa të mos hyjnë në bisedë tjetër. Përndryshe, ju do të jeni si ata. All-llahu do t’i tubojë tradhëtarët dhe jobesimtarët që të gjithë në xhehennem."
[En-Nisa, 140]

Ibn Kethiri kur e komenton këtë ajet thotë:
"Nëse ju qëndroni në një mexhlis (ndejë) ku tallen me fenë e Allahut dhe ti nuk i kundërshton ata apo i përkrah ata, në këtë rast edhe ti je sikur ata (prej pabesimtarëve)."
[Tefsir ibn Kethir, 1/567]

Të kemi kujdes vëllezër të mos tallemi me fenë e Allahut xh.sh. Gjithashtu, të tallurit me ndonjë musliman për shkak të fesë së tij është kufër, si p.sh të tallet me mjekrën e tij, duke i thënë p.sh je bërë sikur krishterët, apo të përqeshen motrat muslimane duke i thënë se jeni bërë si shkinat me këtë veshje, veshje të cilën e kanë veshur nënat e muslimanëve, pra gratë e Pejgamberit s.a.v.s.

Ai i cili tallet me ndonjë musliman për shkak të fesë së tij, ka bërë kufër. Allahu xh.sh ka thënë:
"E nëse i pyet ti ata (përse tallen), do të thonë: "Ne vetëm jemi mahnitur e dëfruar. Thuaj: A me All-llahun, librin dhe të dërguarin e Tij talleni? Mos kërkoni fare ndjesë, ju pasi që (shpallët se) besuat, keni mohuar (keni bërë kufër)."
[Et-Teube, 65-66]

Pra vëllezër, mos u tallni me fenë e Allahut duke u arsyetuar se, ne vetëm po dëfrehemi dhe po mahnitemi, sepse të tallurit me fenë e Allahut apo të tallurit me ndonjë musliman për shkak të fesë së tij, është kufër që e largon njeriun prej islamit (Allahu na ruajt).

Allahu na ruajt prej shirkut dhe kufrit, dhe na bëftë prej të devotshmëve. Amin