Haxhxhi

Falënderimet dhe lavdërimet i takojnë vetëm Allahut (Subhanehu ue Teala), i Cili e bëri obligim Haxhxhin për ata të cilët kanë mundësi Salavatet qofshin mbi të Dërguarin e tij Muhammedin (SalAllahu Alejhi ue Selem), familjen e tij, shokët e tij, dhe gjithë muslimanët deri në Ditën e Gjykimit.

Me të vërtetë, Haxhxhi është bërë obligim për të gjith muslimanët të cilët kanë mundësi materiale dhe janë psiqikisht të shëndoshë. Allahu [Xhele Shanuhu] thotë:

"E kryeni haxhxhin dhe umren për hir të All-llahut!"
[El-Bekare, 196]

"Për hir të All-llahut, vizita e shtëpisë (Qabes) është obligim për atë që ka mundësi udhëtimi te ajo."
[Ali Imran, 97)

Transmeton Ibn Omeri r.a se pejgamberi [SalAllahu Alejhi ve Selem] ka thënë:

"Është ngritur islami në pesë shtylla: Dëshmia se nuk ka Zot tjetër që e meriton adhurimin përveç Allahut dhe se Muhammedi është i Dërguar i Tij, falja e namazit, dhënja e zekatit, agjërimi i muajit të ramazanit dhe haxhxhi."
[Buhariu, Muslimi]

Haxhxhi është ibadet i cili përfshin të gjitha llojet e ibadeteve siç janë: ibadetet me zemër, me gjuhë, trup dhe pasuri.

Haxhxhi ka qenë obligim edhe për popullin e Ibrahimit a.s, kur Allahu [Xhele Shanuhu] e urdhëroi Ibrahimin që ta ndërtoj Qaben, dhe t’i thërret njerëzit për Haxhxh. All-llahu [Xhele Shanuhu] thotë:

"Dhe thirr ndër njerëz për Haxhxh, se të vijnë ty këmbësorë e edhe kalorës me deve të rraskapitura që vijnë prej rrugëve të largëta. (Vijnë) Për të qenë të pranishëm në dobitë e tyre dhe që ta përmendin All-llahun në ato ditë të caktuara (në shenjë falënderimi) dhe për që i ka furnizuar me kafshë. Hani pra prej tyre (kurbanave) dhe ushqeni të ngushtuarin e të varfërin."
[El-Haxhxh, 27-28)

Me të vërtetë, Haxhxhi është një ibadet i mrekullueshëm dhe ka vlerë dhe dobi të madhe për njerëzit. Prej dobive është se, All-llahu ia falë mëkatet haxhxhiut, siç transmetohet se pejgamberi [SalAllahu Alejhi ve Selem] ka thënë:

"Ai i cili bënë Haxhxhin dhe nuk shanë, e as nuk shkakton polemikë (grindje), do të kthehet nga Haxhxhi sikur atë ditë kur e ka lindur nëna e tij."
[Buhariu, 2/209; Muslimi, 1350]

Gjithashtu ka thënë:

"Umreja deri në umren tjetër është shkaktar për shlyerjen e mëkateve që janë bërë mes tyre, gjithashtu Haxhxhi i pranuar nuk ka tjetër shpërblim përveç se Xhennetin."
[Buhariu, 1773; Muslimi, 1349]

Nga dobitë është edhe shikimi i mirësisë së All-llahut [Xhele Shanuhu], siç thotë All-llahu [Xhele Shanuhu]:

"(Vijnë) Për të qenë të pranishëm në dobitë e tyre.." [El-Haxhxh, 28] Dobitë në Haxhxh janë të shumta, prej tyre: të përkujtuarit e All-llahut [Xhele Shanuhu] me tekbire, qëndrimi në Arafat, Muzdelife, hudhja e gurëve, tavafi, Safa dhe Merve, qëndrimi në Minne, prerja e kurbanave etj.

Nga mirësitë e Haxhxhit është edhe takimi i Muslimanëve nga anë e mbarë bota; në një kohë, në një vend, dhe me një qëllim të caktuar, i cili është të adhuruarit e All-llahut dhe përgjigjja ndaj ftesës së Tij për ta kryer Haxhxhin. All-llahu [Xhele Shanuhu] thotë:

"Nuk ka dyshim se ky Ummet (Vëllezëria, Ligji e Feja juaj, Besimi i Pastër Islam) është një fe dhe Unë jam Zoti juaj, kështu pra më adhuroni vetëm Mua."
[El-Enbija, 92]

Të gjithë i bashkon TEUHIDI, njëshmëria e All-llahut [Xhele Shanuhu]. Të gjithë duke i përsëritur fjalët:

"Leb-bejk All-llahum-me leb-bejk
[Të jemi përgjigjur o All-llah të jemi përgjigjur]

Leb-bejke la sherike leke lebejk
[të jemi përgjigjur o Ti i cili nuk ke shok

In-nel hamde, ve ni'mete leke, vel mulk, la sherike lek"
[me të vërtetë se falënderimet, mirësitë dhe sundimi të gjitha janë për Ty,
dhe nuk ka shok që i takon adhurimi përveç Teje.]

Muslimanit (i cili ka mundësi materiale) i obligohet që sa më parë t'a kryej këtë obligim, sepse nuk e din se kur do t'i vijë momenti i vdekjes. Pejgamberi [SalAllahu Alejhi ve Selem] ka thënë:

"Shpejtoni për në Haxhxh, sepse ju nuk e dini se qka do t'ju ndodh nesër."
[Ahmedi. Kurse shejh Albani ka thënë se ky hadith është hasen (Irva el-Galil, 990)]

Kurse ai i cili e vonon atë pa arsye, duke i pasur të gjitha mundësitë, ai ka bërë mëkat dhe duhet të pendohet tek All-llahu [Xhele Shanuhu].

E lusim All-llahun [Xhele Shanuhu] që të na e mundësoj kryerjen e Haxhxhit, kurse atyre që e kanë kryer apo do të shkojnë t'a kryejnë atë, e lusim All-llahun [Xhele Shanuhu] që t'ua pranojë Haxhxhin, dhe të kthehen në shtëpitë e tyre të pastërt nga mëkatet, sikur atë ditë kur i kanë lindur nënat e tyre.